हमर छत्तीसगढ़ के भाखा, बोली-बानी, गीत-संगीत अऊ पुरखौती संस्कृति ला जिंदा रखे बर काम करत “रेडियो संगवारी” के टीम आज विधानसभा अध्यक्ष Dr. Raman Singh संग स्पीकर हाउस मं जा के भेंट-मुलाकात करिस।
रेडियो संगवारी के संचालक राहुल शर्मा ह अपन काम के बात बतावत कहिन के ये मंच पिछले 3 साल ले गांव-गांव के लोककला, लोकगीत अऊ कलाकार मन ला मोबाइल अऊ इंटरनेट के सहारा ले दुनिया भर मं पहुंचावत हवय।
ओमन बताइन के “जस जवारा”, “सत के रद्दा” अऊ “लोक रंजनी” जइसन कार्यक्रम मं हमर छत्तीसगढ़ के कर्मा, सुवा, ददरिया, पंथी, पंडवानी, भरथरी जइसन लोकगीत मन के प्रस्तुति होवत हवय, जेन ला लोगन मन बहुत पसंद करत हें।
ए बात ला सुनके अध्यक्ष महोदय ह बहुत खुश होगे अऊ कहिन—“तुमन बहुत बढ़िया काम करत हवव, ए काम ले नवा पीढ़ी अपन माटी अऊ संस्कृति ला जानही अऊ जुड़ही।”
ए बखत रेडियो संगवारी के टीम ह अध्यक्ष महोदय ला अपन स्मृति चिन्ह भेंट करिस, जेन ला देखके वो ह कहिन के ए मं साफ झलकत हवय के तुमन अपन संस्कृति बर कतका सजग हवव।
संग मं रेडियो संगवारी के प्रॉस्पेक्टस घलो दे गीस, जेन ला ओमन बड़े ध्यान ले देखिन अऊ सराहना करिन।
सबले खास बात ये रहिस के अध्यक्ष महोदय ह रेडियो संगवारी के काम ले प्रभावित होके अपन लेटरहेड मं शुभकामना संदेश घलो देइन, जेन ह संस्था बर एक बड़े सम्मान के बात आय।
रेडियो संगवारी के टीम ह कहिस के ए सफलता मं सब्बो कलाकार, संगवारी, श्रोता अऊ शुभचिंतक मन के बराबर हिस्सा हवय, अऊ आगू घलो ए मंच के माध्यम ले हमर छत्तीसगढ़ के माटी के खुशबू ला दुनिया भर मं फैलाय के काम जारी रहिही।
